Inburgere..

Hallo leeve allemaol,

Wird alweer tied veur ein reisverslaag, want hub toch weer ein aantal dinge mitgemaak die ich gear mit uch wil deile.

Eindelik kin ich uch vol trots vertille det ich de weag weit en neet meer verdwaald bun geraak! Wiehoee.
Inburgere..de titel zeat ut al. Miene bandj mit de kinjer wird steeds closer, volges Kylie vroge ze aafgelaupe zunjig wie ich de ganse daag op joets waas wo ich waas en wanneer ich teruk kom. Det de aadste mich smorges om half 8 int weekend wakker maak om mario karts te spele, dao bun ich get minder bliej mit maar goed ut heat auch weer get.
Ech leuk, ze hawwe paar weake geleje veur ut eers ein stroopwaofel gegeate. Zia oot eine hap, het keek mit grote uig en zag: ' Woow!' haha geweldig.
Toch leer ich hiej auch veul om ' out of the box' te dinke waat opvoeding betruf. De aadste mot nao sjool altied hoeswerk make en lits wol dr het neet make. Oeteindelik toch zo ver gekrege det dr aan zien hoeswerk begos, toen dr mit de vraog kwoom of dr ' orange juice' moch. In Nederland zoe det nag neet zo veul oet make, maar hiej in Australie zeen ze qua eate ech gezond. Kinjer kriege gein vruchtesap of frisdrank door de weak en auch gein snoep. Het gevolg dus det der auch van mich gein orange juice kreeg. Toen det het geval waas wol dr ongerhanjele en zag der es ich hem gein orange juice goof hea auch neet verder ging mit zien hoeswerk. In plaats van te reagere mit " jewaal doe mos dien hoeswerk make' , dach ich biej michzelf det ich det noe ins get anges aan ging pakke. Ich zag ' oke den maakse dien hoeswerk toch neet, zal mich gein zorg zeen' . Ich pakte zien hoeswerkbook klapte det toe en wol het weglikke. Op det moment keek dr ech van huh waat deit det noe en zag dr 'oke good ich gaon het waal make'. Die strategie gaon we dus volgende keer (moch det nag ins veurkomme) weer toepasse.

Auch begin ich langzaam meer invulling te geave aan de daag, zo wie ich eerder vertilde vervealde ich mich toch waal in de ochtende. Sinds paar weake bun ich noe op de dinsdig en donderdigmorge biej ein anger gezin begos. Wederom auch zeer leeve en leuke luuj, helaas waal get chaotisch waat truk te zeen is in de hoeshaajing (leas: neet opgeruimd).
Gezin mit drie meide van 8, 4 en 16 moande) erg leuk, zo kom ich onnag ins urges en tis neet wiejt van wo ich woon.
De woonsdige vul ich meistal in mit het ontmoete van anger au pairs en op vriedig is noe vaste prik det we mit ein groepje Nederlandse meide gaon pickniche in de botanic gardens (vlakbiej het Opera house). Erg gezellig. Dao mit wil ich auch verwieze noa mien titel, genaamd ' inburgere' want langzaam beginse toch hiej dien leave vorm te geave en dien vaste patrone te ontwikkele. Alhoewel ich mot zikke det ich veurige weak effe ein klein heimweemoment haaj. Ich waas allein, het reagende boete. Toen mos ich waal effe slikke. Maar wie ich einmoal de kinjer haw opgehoald en ich neet meer allein waar, waar ich weer content. Haaj der auch nag effe mit Kylie en Jonathan euver gehad, want ze vroage mich iddere daag ' how was your day'. Toen ich vertilde det ich effe ein heimweemoment haaj zag Kylie mich: ' the good thing about travelling is that you get lots of time tot think about yourself and you get to know yourself better, the bad thing is that you get to know yourself'. Jonathan wol al drek panneukeuk veur mich gaon bakke en ging mich films zeuke die ich kos kieke om mich op te vrolijke. Det maakte zo veul good. Maar detgene waat Kylie zag, ze sleit daomit waal ech de spijker op zien kop, want zo is het waal. Ich dink redelik veul nao euver waat ich hiej allemoal wil zeen en doon, maar auch waat ich wil doon dalik (wanneer det is nag ummer de vroag) es ich weer teruuk gaon nao Nederland. De vroag wo ich veural aan dink is ' werk'. Wo gaon ich dalik sollicitere, want wil ich waal sollicitere in de social work sector woveur ich geleerd hub? Nja we hubbe in idder geval nag effe de tied om det oet te zeuke.

Aafgelaupe zunjig waar ich nao the Dutch shop geweas, ein winkeltje waat al meer es 30 jaor gerund wird door ein Nederlandse vrouw en wo detse allemoal Nederlandse producte kins kaupe en ein breudje frikandel kins eate. Helaas waar ut neet de echte frikandel, smaakte meer nao gehakt. Maar de sfeer deromhear en de muziek haaj toch waal get. Gek eigelik detse inins alle producte wils kaupe diesse normaal eigelik neet gauw zoes eate in Nederland zo wie besjuut mit muuskes en speculoospasta. Oeteindelik hub ich mien winkelmandje ingelaje mit peaperkook, stroop, stroopwaofels en speculaas.

Veurige weak moandig toch nag get bezunjers mit gemaak. Op maondig gaon ich altied mit het kleinste boodsjappe doon. Den krieg ich ein beursje mit van de familie mit geld veur de boodsjappe. Ich mien winkelkerke vol gelaje, noa de kassa om te betale. Bleek det ich 20 dollar te weinig haaj. Oei dach ich, en noe? Maar gevraog aan de kassiere of ich get boodsjappe kos teruuk geave want ja ich haw neet genog. Trik de vrouw waat achter mich inne kassa steit de beurs en guf de kassiere 20 dollar. Ich stong effe perplex ich dink waat gebeurd mich noe. Gezag det det toch ech neet neudig waar, maar de vrouw stong derop. Ich wol heur nag ut kleingeld (5 dollar) geave maar det wol ze toch ech neet hubbe. Achteraaf gezeen haaj ich heur naam en telefoonnummer motte vroage, maar op det moment dach ich dao ech neet aan. Zoget zulse in Nederland in idder geval neet gauw mitmake, dao zulle ze eerder ins zuchte of mit de uig rolle ipv de beurs te trikke.

Vanmorge waar mich toch get fijns euverkomme. Ich waar mien tenj aant poetse inne badkamer, heur ich inins ein geritsel in het bad. Kiek ich..zit dao eine kikker. Bahbah. Snel badkamerdeur toegedaon, Jonathan gesmst det dr ein kikker oppe badkamer zoot en toen de deur oet (want ich mos biej det anger gezin werke). Paar oer later kreeg ich pas berich teruuk van Jonathan det der ut net pas haaj geleaze mit es gevolg det dea kikker dus nag ummer oppe badkamer zoot. En jawel hoor, wie ich de kinjer haw opgehoald kwaam Jethro rennend noa mich hear det dr wol gaon plasse en wie dr de wc eupende dr unne kikker inne wc zoot. Het beesje haaj zich dus effe verplaats. Oeteindelik hub ich um doorgespeuld (jao joa ich weit ut, dierenbeul). Noe hub ich dus es bienaam hiej in de familie' KIKI' oftewel kikker killer.

Dinger die ich aafgelaupe weake nag gedaon hub ware:
- Nao glebe market geweas: ein markt die wird gehaaje op ein speelplaats van ein sjool. Heel erg leuk, neet super groot maar leuke kreumpkes.
- Nao Manley beach geweas same mit Magda. Dao moste we mit het vear heargaon, zoe ein van het mooiste en grootste strande zeen hiej in Sydney. Wie we dao aan kwome dachte we nag ' is dit het?' waas ech ein super klein strandje. Echter de litste 15 minuut veur we moste gaon kwame we drachter det aanne euverkanjt vanne stroat het strand waar wo we moste zeen. Haaje we dus maar 5 minute tied om det te bekieke. Haha. Maar goed, gaon der vas nag waal ein keer hear.
- Nao open air cinema. Ich haw keartjes gekrege van Kylie en Jonathan veur de open air bioscoop. Ein bioscoop in ein park wobiej idderein zien eige picknickkleedje mitnump en eate en drinke om film te kieke. Erg leuk om mitgemaak te hubbe.

Kommend weekend vertrik ich mit de poase veur 10 daag noa Fraser Island en Whitsundays. Ich wins uch allemoal fijn poasdaag en zal probere get zon dea kanjt oet te sture!