Every ending has a new beginning..

Allereers veur idderein ein zalig nuujjaor en de biste winse veur 2016.
Het litste en tevens auch de langste blog tot noe toe vanoet Australie, nag zo’n 3 weake en den zal ich weer terugkere nao ut kaaje Hollandia. Ongeluiflik waat dea tied is gevloage, ein jaor is eigelik nieks achteraaf gezeen. Het veult in idder geval neet of wen ich ein dalik ein jaor weg bun geweas.

10 December waas miene litste wirkdaag biej de familie Couper. De litste weake waas ut lekker druk in huize Couper, de mooder van James, Sally, en heure partner Alex kwame euver vanoet Nieuw Zeeland om Truly-Belle (de zus van James) heure verjeurdaag te viere. Es verassing kwaam auch nag ein nichske euver en ein paar daag later arriveerde Mabel, waat mich zoe opvolge es au pair in het gezin. Lekker druk, maar waal ech gezellig. Wederom hub ich geluk gehad mit dit gezin, waat ein leef luuj ich veulde mich ech ein ongerdeil van het gezin. Zo weit ich det wie ich eine keer mit de scooter nao de stad wol gaon en James teage mich zag: ‘Please be careful, we all care a lot about you’. Het kiendje waas auch ech ein mupke, de litste paar weake kos het eindelik miene naam zikke ‘tasja’ en det wirde auch om de haverklap gerope.
De woonsdig veur mien vertrik haaje ze thais eate gehoald es aafsjied. Nao het eate vroge ze of ich mich inne kamer wol installere, want zie haaje get veur mich veurbereid. Ich dach nag waat geit noe gebeure. Ze hawwe ein toneelstuk veur mich bedach euver wie ich dao kwaam wirke. Ech heel erg leuk, dit moment zal mich nag lang biej blieve.

En vriedig 11 december waas het den zover. Mien au pair avontuur zoot dr definitief op en mien 2 moand durende reis nao Nieuw Zeeland en de westkust van Australië ging eindelik van start. Eerst twee weken nao Nieuw Zeeland om van dao oet truuk noa Australië te vleege en same mit Mandy in eine camper de westkust van Australië te verkennen.
Nieuw Zeeland waas prachtig, waat ein prachtig land (stiekem eigelik waal get sjoaner es Australië). Zo greun alles en zo veul natuur en de oetzichten wisselden regelmoatig van greun weidevelde nao berg nao watervalle. Auch de luuj ware ontzettend aardig en behulpzaam. Toen dach ich nag ech, waorom kint det in Nederland auch neet zo zeen. De eerste daag det ich aankwaam, 00.00u snachs waas ich mit mien koffer en handbagage om mich hear aant kieke en mien hostel aant zeuke. De taxi haw mich namelik biej de verkeerde aafgezat, wis ich veul det dr twee hostels ware mit dea naam. Nag neet gauw naodet ich zeukend om mich hear aant kieke waar wirde ich aangesproake door eine jong. Hea vroog of ich hulp neudig haaj. Ich hem oetgelag det ich het hostel neet kos vinje. Hea drek ziene telefoon mit googlemaps drbiej gepak en opgezoch wo ut hostel loog. Gelukkig waas ut maar zon 5 minuut laupe. Hea zeat ich laup mit dich mit en droog ongertusse mien koffer. Einmaol biej het hostel aangekomme zag dr, ich wach hiej waal tot desse ingecheck bus den weit ich zeker det t good zit. Einmaol ingecheck in het hostel zwejde dr en ging dr. Ein good begin dus.
Mien eerste weekend startte mit eine tour noa Hobbiton, de set van Lord of the Rings. Heel erg bezunjer en heel erg mooi en greun. Hieveur waas ich speciaal noa het noorder eiland gevloage. Ich bun auch maar 2 daag op dit eiland geweas en dernao vloog ich nao ut Zuider eiland om dao aan ein bustour te starte. Veur det de bustour startte haw ich nag 2 daag in Christchurch. In Fiji haw ich eine jong lere kinne waat ein Christchurch woonde, dus wie ich nao Nieuw Zeeland ging hub ich um ein berichske gestuurd. Hea heaf mich toen rondgeleid door Christchurch. De stad zelf is jaore geleje getroffe door ein aardbeving en toet op vandaag zuusse det nag steeds. Heel veul geboewe hubbe nag ummer veul sjaaj en staon dr vervalle biej en bienao alles steit onger constructie. Ech heel apart, veulde ein bietje wie zon spookstad. Nao die twee daag in Christchurch startte de bustour. Mit dees tour bun ich in versjillende plaatse geweas: Franz Josef, Wanaka, Queenstown, Invercargill, Stuart Island, Mount Cook en Rangitatta en toen truuk nao Christchurh. Veul gezeen en gedaon. In Franz Josef bun ich mit de helicopter nao eine icegletcher gevlaoge om dao door ut ies te klumme. Waat ein geluk hawwe we dea daag, want de tour waas al 10 daag op riej gecancelled vanweage ut wear. Zodra ut reagent of bewolk is kinne ze de tour namelik neet door laote gaon, omdet dit te geveerlik wird mit de helicopter. Mien eerste helicoptervluch..jaa! ech sjoan.
Vlak veur het pleatse Wanaka in het kleine pleatske Fox Glacier besloat ich de sprong te wage en bun ich gaon skydive. Ich dach ich bun noe hiej, ein sjoaner plaats guf ut zich neet. We zote inne bus en de tourgids vroog weam wol skydive, same mit twee anger meadjes stook ich mien hanjd op. Hea zag det het skydive vandaag plaatsvonj, maar eave later haw dr ut euver skydive veur morge. Ich mich dus ingestild det ut skydive vandaaag neet plaats zoe vinje maar de daag drop. Eave later rieje we ein plaats op en steit ein mega groot bord ‘skydive’. Oei dach ich, ich gaon dus noe ech skydive. Ein oer later mit eine nerveuze glimlach en riejerende henj en bein zoot ich int vleegtuug. Es tweede moch ich springe en eigelik vanoet daoboave veel mien hoogtevrees reuze mit. Het holp auch det miene bril beslage waas en ich neet veul kos zeen. En toen waas ut zowiet, jump! Boh waat waas det sjiek en waat ein oetzich van daobaove. De zee, de gletsjer en het plattelanjd. Helaas haw ich waal bis las van mien oren. Maar goed, het waas het ech weard. Meerdere foto’s hievan volge nag, maar die staon noe op eine usbstick en ich mot eers nag ff ein paar sjoan droet haole, want de meiste zeen toch neet zo charmant haha.
Det skydive waas eigelik ut hoogtepunt van mien activiteite. In de angere plaatse die we bezoch hubbe, bun ich veural gaon wanjele en foto’s gaon make. In Rangitata bun ich nag gaon peardrieje, waat auch heel erg leuk waas. Helaas hub ich mich dao de inkel get verstuuk wie ich van het peard aafsprong. Det kint het biste peard vanne stal gebeure;)
Nao 10 daag rondgetourd te hubbe door het Zuider eiland eindigde ich op eerste kersdaag in Christchurch wo Sally en Alex mich ophoalde om biej hun kerst te viere. Dea daag waas ut bis werm, 25 grade. Daodoor waas het kersgeveul ver te zeuke. Sowieso waas dr neet ech veul kersversiering of kersmuziek op radio, wodoor ich totaal neet het idee haw det ut kers waas. Waal eine hele sjoane daag gehad biej Sally en Alex. Twee anger vrunj kwame nag langs en smiddigs hubbe we ein putje gekaart in het zunke.

Tweede kersdaag hub ich in het vleegtuug doorgebrach, ich vloog op dea daag van Nieuw Zeeland truuk noa Australie, noa de stad Perth. Van te veure nag gein hostel geregeld, op vleegveld ff opgezoch welk hostel fijn int centrum loog en oeteindelik eine gooie gevonje. Ingecheck en nao de kamer. Ein kamer mit 20 bedde en..ich waas de enigste.
Erg fijn, maar urges vonj ich ut auch waal vreamp. Normaal in ein hostel zitte allemaol backpackers (miense van rond de 20 en aajer). In dit hostel waas geine backpacker te bekinne, maar ein paar Aboriginals, miense van rond de 50. Ich dach nag wo bun ich noe belandj. Wie ich mit eine miens aanne kal kwoom vertilde dea mich det de meiste daakloos ware en hiej woonde. Die nach hub ich slech geslaope. Gelukkig kwaam de volgende daag ein anger meadje oet Nederland op mien kamer en eave later arriveerde auch Mandy, es dit neet het geval waas waar ich waarsjienlik nao ein anger hostel vertrokke.

Zo ver mien ervaring in Perth, 29 december waas ut zo wiet. Dit waas de daag det we de camper koste ophaole. Toen we os campertje zage veel ut ein bietje teage, waat eine aaje klommel haha. Wie we wegreje maakte dea ein geluid wie ein gillende keukemeid, dit heel euverigens maar heel ff aan. Maar goed hea heat os tot noe toe van a nao b gebrach zonger mankemente (ff aafkloppe).
Op moment van sjrieve van dit blog zit ich in Exmouth en hub ich al 2 weake inne camper drop zitte. In eerste instantie zoewe we tot Broome rieje, nag zon 12 oer rieje van Exmouth aaf. Maar vriewel in het begin ware Mandy en ich beide van meining om det toch maar neet te doon. Ongerweag van Exmouth nao Broome is dr neet veul te zeen van waat we geheurd hubbe vanne locals en Broome zelf mot onneet zo speciaal zeen. Dr is ein strand ‘cabel beach’ wo detse mit kamele kins rieje en det is auch ut meist populaire. Maar goed we hubbe al meerdere sjoane strande ongerweages gezeen, keuze waas dus snel gemaak. Daobiej zoe ut in Broome onnag zon 40 grade zeen en is dr meer kans op cyclone. Des noe ech het ideale van eine camper, doe kins dien planne zo omgooie. Bevilt mich den auch erg good, zo veul vrieheid. Es we ein plaats leuk vinje blieve we der ein paar nachte en is ut nieks den rieje we door. Mit aad op nuuj haaje we nag gein planne. Toen we urges stinge om te tanke ging ich ins ff google waat dr te doon waas en kwaam ich ein pleatske teage wo ze eine rodeo haaje. Lang hoofde we hiej neet euver te twiefele, dao wolle we allebei waal hear. Effe oetreakene wie lang ut rieje waas (3 en half oer), dit waas nag net op tied veur det ut ging sjemere. Ze hubbe os namelik gezag det we kinne rieje tusse 9 en 18, vanweage de kangaroos die nao det tiedstip oppe weag kinne springe. En dao haaje we os auch fijn aan, want we hubbe ongertusse al veul dode kangaroos neave de weag zeen ligge.
Ongerweag snel gestop biej ein tankstation, os dao gedouch en getank en hoppa verder. De rodeo zelf waas sjoan, maar qua aad op nuuj waas wederom neet ut besef det ut aad op nuuj waas. Dr wirde aafgetild, happy new year gezag en det waas ut. Gein vuurwerk nieks. We loge dea aovund den auch oppertied in os campertje om te sloape.

De westkust zelf is in idder geval ech prachtig. Ech heel veul stukke is geweun nieks en de tomtom guf waal ins aan ‘sla na 150 km linksaf’, maar de plaatse wo we gestop zeen ware waal erg bezunjer. Zo wie de pinnacles, eigelik allemoal soart van hoge stein die in het zand omhoog steake. Shell beach, ein strand mit allein maar sjelpe en Monkey Mia wo de dolfijne geweun 1 meater van dich aafzwumme biej het strand. Heel biezunjer. Nao Exmouth wo we op dit moment zeen, rieje we nao Karijini National park, het sjoanste van de hele westkust volges velen. Ich bun benuujd, dit wird metein auch de wermste plaats want volges locals zoe ut dao noe zon 40/45 grade zeen. Flink veul water mitnumme dus en zonnebrandj. Nao Karijini rieje we op os gemakkie truuk nao Perth veur de litste paar daag om dao Australia day te viere, nag ein horserace bie te wone en nao Rottnest Island te gaon. En daonao is ut veur mich alweer bienao tied om truuk heives te vleege. Dees verdere avonture zal ich uch den de eerst volgende keer in real life kinne vertille

Heel erg bedank allemaol veur ut leaze van mien blogs en auch veur de leef reacties, dees vonj ich ummer leuk om te leaze. We zulle zeen waat 2016 nag meer in petto zal hubbe.