Brizzy Brisbane, Gold Coast en Byron Bay

Hallo leef miense,

Ut is alweer effe geleje det ich gesjreve hub. Eigelik hub ich in Sydney zelf neet ech veul meer mitgemaak. Alles is noe eigelik geweun, misjien klink ut raar maar ich kiek neet meer op es ich in de trein zit op weag nao de stad en links van mich zeen ich het Opera House in mien beeld. Om eerlik te zeen hub ich ut nao 5 moand Sydney auch waal gehad, het drukke stadsleave en allein mer geboewe en hoeze om dich hear (tjaa ich blief toch ein durpsmeadje) en wil ich gear meer ontdikke van dit sjoane landj. Toch zeen de weekende waal ummer eave gezellig mit ut vaste vriendengroepje, waat bun ich dao bliej mit.
Gelukkig hub ich dankzij mien hostfamily de meugelikheid gehad om meer van dit landj te zeen. Aafgelaupe weak haaj ich ein weak vriej om drie plaatse langs de oostkus te bezeuke.
Eerste bestumming, Brisbane. Hiej zoe ich biej Liesbeth en Jos verblieve, twee superleef miense oet het eige durp. Ich waas smorges mit de vleeger aangekomme, toen zeen we effe de omgeaving van Cleveland (suburb van Brisbane) gaon verkenne. Waat ein prachtige omgeaving, lekker zunke, oape velde..kortom waat wilse nag meer.
De daag derop waas het den zover. Lone pine Koale sanctury!! Jeej, eindelik zoe ich den eine koala zeen, want om eerlik te zeen baalde ich drvan det ich nag ummer geine koala haw gezeen. Dao gearriveerd kwome we snel biej de koala's aan. Waat ein sjattige beeskes en es echte toerist mos ich dao natuurlik auch mit oppe foto. Jeetje, waat heaf det beeske sjerpe neagelkes, maar ich hub waal ein foto dus ich moog neet klage. Neave de koala's waas dr auch ein groot graasveld wo kangaroos zote. Dees ware taam en kosse geweun aaie en voore. Natuurlik wirde de camera weer teveursjien gehaold. Neave kangaroos hub ich auch nag ein eendenbekdier (platipus), wombat en eine tazmanian devil gezeen en ohja en de geveerlijke kalkoen (ich bun ff de naam kwiet) maar het waas ein sjoan beeske mit eine hamer oppe kop. Erg sjoan om al die beeskes te zeen van Australie.
Nao de neudige foto's gemaak te hubbe zeen we noa Mount Cootta gereje. Liesbeth en Jos zagte det ze vanoet dao ein prachtig oetzich hubs euver de stad Brisbane. Dao waas nieks aan geloage, ech ein geweldig oetzich. Nao ein lekker teske cappucino en foto's weer truuk nao de auto. Dao kwaam eine limousine aangereje en stinge de neudige luuj in opgedirkte kleijer langs de kanjt. Ze hawwe mich echter kleijercombinaties aan dao zeasse U teage. Dao stapte te broed oet, ein sjoan tatoage op heur decollete. Maar..wea waas noe de broedegom? Dr stapte waal eine veul aajere kearel oet, wovan weer dachte det het heur vader waas. Maargoed..die vroag is veur os alledrie toet op de daag van vandaag nag steeds ein roadsel. Es aafsloeter van deze sjoane daag gezellig wijntjes gedronke op de veranda same mit de buurvrouw.
De volgende daag sting de stad Brisbane op het programma. Smurges de stoptrein nao Brisbane mit de neudige tussestops (20 ongeveer). Brisbane waas kleiner es Sydney maar waal gezelliger. Door de stad lup ein rivier wodoor dr versjillende brukskes zeen. Aan de euverkant van de bruk waas ein zwumbad/strand naogemaak. Op het graasveld zote de luuj en dr waas ein bendje aan het spele. Het zunke sjeen wederom weer, kortom perfect! Helaas waas dit auch alweer de litste daag, want de daag drnao zoe ich nao de Gold Coast gaon. Time flies when your having fun. Liesbeth en Jos heel erg bedankt veur dees sjoane daag en de goede zorgen!

Gold Coast..det waas de volgende bestemming. Ich kos hiej in het hoes van Kylies mooder verblieve. Op det moment det ich dao waar, waas het in Sydney maar wore waal nag ut breurke en zusje van Kylie dao.
Liesbeth en Jos brachte mich hiej naotoe. Dao moste we door ein port ein soart priveterrein op. Dao loge allemoal prachtige hoeze. Wie ich het hoes zoog van Kylies mooder dach ich : 'woow' . Vanoet het zwumbad ein oetzich euver de ganse Gold Coast (Gold Coast is trouwes de naam van de plaats). Ich mot waal zikke det ich meuite haaj om Liesbeth en Jos oet te zwejje, want daomit veel het vertroewde ein bietje weg. Het lekker limburgs kinne kalle enzo.
Maar goed, het breurke van Kylie, Benjamin, leidde mich rond door het hoes en wees mich mien kamer. Erg mooi, no complains. Dea zelfde middig is hea mit mich nao Surfers paradise gereje om effe lekker euver het strand te laupe en van het zunke te geniete. De daag drop bun ich auch nao dit strand geweas en hub ich get winkelkes gespot. Dernao hub ich mich de quackerduch gepak. Dit waas eine auto/boot, jao geer leas ut good. Eerste stukske euver de weag en toen op het water. Erg sjoan maneer om get meer van de Gold Coast te zeen. De litste daag zoe ich same mit Benjamin walvisse gaon spotte. Ich haw dr zin in, haopelik zoewe we auch ech walvisse zeen. We reje nag langs ein klein eilandje wo ze pirates of the caribbean aan het opnumme ware. Leuk om te zeen. Dernao ginge we verder en verder toet we op de oape zee reje. En toen ging het mis. Mich begos toch de maag ein bietje te drejje en ich zag teage Benjamin det ich mich ff onger ging zitte (weer zote namelik boave op het dek). Onger aangekomme zoog ich al ein riej miense zitte mit papiere kotszekskes. In ein heukske waas nag ein steulke vriej. Dao bun ich mich fijn gaon zitte en hub ich allein maar nao ein plek zitte te stare. Det ging allemoal good zolang dr geine teage mich begos te kalle of es ich maar neet hoofde om te kieke en gelukkig hub ich vanoet det punt wo ich hear kiek onnag walvisse gezeen, dus de tour is neet veur niks geweas. Benjamin haw ich ongertusse al miene camera gegeave zodet hea foto's kos make. Nao die paar uurkes vore we weer truuk nao landj. De luuj neave mich ware allemoal ein veur ein die zekskes aant vulle en het moment det ich ut rook kos ich mich onneet meer inhaaje. Waat waas ich bliej det ich weer aan landj waas. Helaas bun ich dea ganse daag neet veul weard geweas. Gelukkig hub ich waal in het buske nao Byron Bay get geslaope. Einmaol in het hostel ging het get beater, ich checkte in en leep nao mien kamer. Dao deej ich de deur oap, allein maar ein kamer vol mit jongens..toch nag ein bietje geluk. Zikke ze get van vrouwluuj det die rotzooi make, maar ich kin ich vertille det die kearels dr auch get van kinne. Euveral kleijer, sjoon en eine vieze zweitgeur. Neet ech ein gooi combinatie esse dich neet al te good veuls maar goed.
De daag derop bun ich nao de vuurtore gelaupe van Byron Bay. Waat ein heerlik pleatske. Mooi oetgebreid strandj, relaxt sfeertje, hippies (jao ze bestoan nag!). Idderein haw mich van te veure vertid det Byron de plaats waas om te surfe. Nja ich bun maar eine keer hiej toch? dus haw ich mich ein surfles geboek. Waat ein leuke ervaring. We krege de basistechniek aangeleerd op het strand, dernao ginge we de zee in om het oet te probere. Helaas is het mich neet geluk om rechop op die surfplank te komme (ich mot misjien ins get yogalesse volge) maar eavegood ein hele leuke ervaring.
Al mit al weer mooie herinneringe verzameld:)

Effe euver mien verdere planne..ich bun nag maar 4 en halve weak in Sydney en den zit mien tied biej dit gastgezin dr al op. Den gaon ich ein weakske nao Fiji en vleeg ich door nao Adelaide (zuiden van Australie), want om nao 6 moand truuk nao Nederland te gaon geit mich toch neet lukke want den hub ich neet alles kinne zeen waat ich wol zeen. In Adelaide gaon ich nag 4 moand aan de slaag es au pair in ein gezin mit ein meadje van 15 moande. De vrieje weekende gebroek ich om meer van de omgeaving te zeen. Ich hub dr waal zin in, nuuj omgeaving, nuuj oetdaging.
Nao dees 4 maond gaon ich twee weake nao Nieuw-Zeeland en es aafsloeter (en kers op de taart) de Westkust van Australie in eine camper same mit Mandy. Den zeen ich uch allemoal 2 februari weer truuk in Nederland om dao de vasteloavundj same te viere:) Alaaf!