Dont' dream about live, live the dream

Hub ff op mich laote wachte, maar dao is dr den, ein nuuj blog.
Waarsjienlik zal dit ein van mien litste blogs zeen waat ich sjrief, want euver zon 5 weake zit miene au pair tied drop en gaon ich zon 6 en halve weak non stop reize:).

Det effe terzijde, verder mit mien blog.
Inmiddels al 11 weake in Adelaide. Biej het gastgezin bevilt ut nag ummer heel good, ech leeve luuj. Veul mich hiej ech thoes.
Ondanks det mot ich eerlik bekinne det ich mit het 'au paire' waal klaor bun. Begriep mich neet verkeerd, ich vinj kinjer heel erg leuk, maar om 11 oer op unne daag op ein kleintje te litte is toch anges. Bun toch waal bliej es de aajers saoves thoes komme en ich Lydia aan heur kin geave. Respect veur alle aajers euver de ganse weareld, want opvoede is zeker neet ein van de mekkelikste taken.
Ein leuk nieuwje is det de gastfamilie auch ein nuuje au pair heaf gevonje en dit mien maatje Mabel is, wo mit ich same 3 maond in Curacao bun geweas. Leuk he wie de dinge kinne gaon:)

Neave het au pair werk hub ich auch veul vrieje tied, in Sydney ging ich idder weekend op paad. Sydney is ein drukke stad, straote vol mit luuj en zon 2 oer riej en doe bus nag ummer omrink door hoeze. Ich hub eine geweldige tied dao gehad en hele mooie vriendjsappe aan euver gehaoje, Nao die 6 moand waas ich waal ff klaor mit de drukte. Hiej in Adelaide hub ich daorom meer tied en enerige gestaoke in wanjelinge door de parke, geweun lekker leaze en van het lekker wearke geniete (ich weit det geer dit misjien leever neet wilt heure maar hiej begint ut zomer te weare en de tempeoratuur geit langzaam richting de 28 grade).
Maar goed, eigelik haw ich naodet ich hiej in Adelaide kwoom ff geine zin om nuuj luuj te ontmoete en weer gans van veuraaf aan te beginne mit :'Hallo ich bun Natasja, ich wirk es au pair etc etc etc'. Veural auch omdet ut maar 3 moand zeen det ich in Adelaide bun. Om ein lank verhaol kort te make hub ich in Adelaide veul tied besteed in het naodinke euver waat ich noe wil mbt de toekomst, op het gebied van werk es ich dalik truk bun in Nederland. Helaas weit ich ut nag steeds neet en haop ich dao langzaam maar zeker achter te komme, maar dao kumse allein maar achter door dinge te doon. Witse ein aantal miense vroge mich waorom ich noe zo lang ging reize ' waat levert het op' en ich kin uch vertille det ut mich veul euver michzelf geleerd heat. Zo wie de meiste weite bun ich eine enorme twiefeleer en ich kin uch mededele det det neet verangerd is, maar waat waal verangerd is is det ich meer euver michzelf te weite bun gekomme. Hetgeen ich misjien gaaroets neet haaj geweite es ich in Nederland waas gebleve.

Neave het au paire en het dinke wil ich natuurlik auch get van Adelaide zeen. In Fiji haaj ich ein Colombiaans koppeltje lere kinne wo ich in het begin al ins get mit bun gaon drinke. Ze spele allebei in ein sambaband en gister kreeg ich ein berichje mit de vraog of ich zin haaj om mite doon mit de repetitie. Jazeker dach ich waorom neet, wie leuk is det. En het waas auch ech leuk. Ze vroge mich welk instrument ich wol spele en natuurlik wol ich toch waal heel erg gear op die grote trommels spele. Angerhalfoer later mit eine smile op mien gezich en eine pienlijke sjouwer van het drage van de trom haaj ich mien eerste samba les drop zitte. Het leuke waas det ze helemoal gein note leaze en continue hetzelfde ritme spele mit aaf en toe ein kleine verangering, het enige waat ich hoofde te doon waas te kieke nao waat de buurman neave mich deej en det te volge. Heel leuke ervaring.

Halverweage oktober bun ich ein weekendje nao Kangaroo Island geweas mit ein tour. Dit eiland lik ein uurke mit het vear van Adelaide aaf. De Australiers zeen heel mekkelik mit name, het waas ein eiland wo veul kangaroos rond huppelde, dus wirde ut Kangaroo Island genump. Zoveul kangaroos hub ich echter neet gezeen. Waal hub ich ein paar koala's in het wild gespot. Erg leuk, blief toch bezunjer. Daoneae zeen we nao versjillende oetkiekpunte geweas en hub ich veur de eerste keer in mien leave gesandboard. Dit waas snowboarde maar den in het zand. Erg gaaf. We ware in totaal mit 17 miense op de tour. Veural veul Duitsers (die zitte ech euveral haha). Dao haaje we ut dr mit ein paar euver om nao de Barossa Valley te gaon en de daag nao de tour bun ich mit twee anger meadjes dao hear gereje. Heel spontane actie, maar waas waal ech eine leuke daag. Wijntjes gepreuf, rondgereje door de wiengaarde en ein lekker zunke. Waat wilse nag meer?

Volgende weak kump Mandy het weekend hiejhear en gaon we same noa de rodeo en de set van Mcleods daughters en den kin ich langzaam gaon aaftille veur mien reis nao Nieuw Zeeland en West Australie. En den..veur geer ut wit bun ich weer truuk in Nederland.
Tot dea tied wins ich uch alvas eine gooie Sinterklaos, fijne feestdage en ein gelukkig nuujjoar!

Wederom dankjewel veur het leaze van mien blog! :)